Novas

10-03-2026 -

10-03-2026 -

Cultura

Fene canta ás Pepitas

A terceira edición do festival Fene canta ás Pepitas, organizado pola SCRD Agarimo coa colaboración da Concellería de Cultura de Fene, celebrarase o vindeiro sábado, 14 de marzo, ás 20 horas no local social de Sillobre. O certame contará coa participación da coral Polifónica O Pote de Maniños, da rondalla Estrelecer e da coral polifónica Agarimo de Sillobre.

09-03-2026 -

09-03-2026 -

Cultura

A teoría do todo: do infinitamente pequeno ao Big Bang, no ciclo Contando Ciencia

A catedrática de Física Teórica do Instituto Galego de Física de Altas Enerxías da USC, Elena González Ferreiro, falará esta semana en Fene sobre a constitución da materia, sobre teorías para comprender as interaccións fundamentais da materia e sobre como se están tentando recrear os instantes do Big Bang nos aceleradores actuais. A conferencia, enmarcada no ciclo Contando Ciencia, será este xoves, 12 de marzo, ás 19.30 horas, no salón de actos da Casa da Cultura con entrada libre e gratuíta. Ciclo organizado pola Biblioteca O Segrel do Penedo do IES de Fene coa colaboración da Concellería de Ensino de Fene e baixo a coordinación da mestra Violeta Miraz Seco.

06-03-2026 -

06-03-2026 -

Fene ao día

As Mulleres da Reconversión reciben en Fene un caloroso recoñecemento polo 8M

A Casa da Cultura de Fene acolleu este serán un acto fondamente emotivo de presentación do proxecto Mulleres da Reconversión, unha iniciativa de memoria e igualdade impulsada pola Deputación da Coruña, a través da súa Área de Igualdade e Dereitos Civís, en colaboración co Concello de Fene no marco da programación do 8 de marzo, Día Internacional das Mulleres.

O acto converteuse nun espazo de recoñecemento colectivo, no que se puxo voz e rostro a unha memoria durante catro décadas silenciada: a das mulleres que viviron a reconversión naval de ASTANO desde os coidados, a organización, a loita e o sostén das familias. A proxección do documental Mulleres da Reconversión, dirixido por Iago Varela, marcou un dos momentos máis intensos da tarde, xerando un silencio compartido entre un público visiblemente emocionado.
Na presentación participaron a deputada de Igualdade e Dereitos Civís, Sol Agra; a directora de Navantia Fene, Carla Chawla; o director do proxecto, Iago Varela; e a alcaldesa de Fene, Sandra Permuy.

06-03-2026 -

06-03-2026 -

Fene ao día

Declaración institucional 8M

Declaración Institucional do Concello de Fene polo 8M, Día Internacional da Muller. Aprobada por unanimidade pola corporación municipal no pleno celebrado onte. Aquí.

04-03-2026 -

04-03-2026 -

Deporte

Máis movemento, máis vida!

Sensibilizar á poboación sobre a importancia de practicar actividade física de xeito regular para mellorar a saúde e adquirir bos hábitos de vida, é o principal obxectivo do Día Mundial da Actividade Física que se conmemora cada 6 de abril por iniciativa da Organización Mundial da Saúde. O Concello de Fene xunto coa asociación Aspaneps súmanse este ano á conmemoración con distintas actividades gratuítas entre as que salientan unha andaina inclusiva o día 12 de abril, reparto de trípticos informativos, unha exposición que rotará polas asociacións do concello e instalacións municipais e dúas xornadas informativas (os días 26 de marzo e 23 de abril) impartidas polo Servizo Galego de Saúde.

04-03-2026 -

04-03-2026 -

Fene ao día

O Outlet de Fene regresa esta fin de semana coa participación de 17 establecementos locais

O Concello de Fene impulsa unha nova edición do Outlet de Fene, que se celebrará os días 6, 7 e 8 de marzo, coa participación de 17 establecementos comerciais do municipio. A iniciativa desenvolverase nos propios locais participantes, que ofrecerán produtos en condicións especiais durante tres xornadas.

O horario do Outlet será de 10.00 a 13.30 horas e de 17.00 a 20.00 horas o venres e o sábado, e o domingo de 11.00 de 13.30 horas. Nesta edición participan os seguintes comercios: MasSport, DaMa, Bualá, El Baúl de Bego, Lencería Loly Calvo, Costuras, Calzados Locay, Mayka Moda, Koralli Boutique, Jomer, Kenia, Berline, A Tenda Agasallos, Dani Reparaciones y Complementos, Cáprica Comics y Juegos, Arrecendo e Luale114.

03-03-2026 -

03-03-2026 -

Fene ao día

A presentación de “Mulleres da Reconversión” centra a programación do 8M en Fene

O Concello de Fene sitúa a presentación do proxecto e documental “Mulleres da Reconversión”, impulsado pola Deputación da Coruña, como eixo central da programación do 8 de Marzo, Día Internacional da Muller. O acto terá lugar o venres 6 de marzo, ás 18.00 horas, na Casa da Cultura, e converterase nun espazo de recoñecemento público ás mulleres que participaron nesta iniciativa de recuperación da memoria colectiva.

A presentación contará coa presenza das protagonistas do proxecto, así como da deputada de Igualdade da Deputación da Coruña, Sol Agra; do director do proxecto, Iago Varela; da presidenta de Navantia, Carla Chawla; e da alcaldesa de Fene, Sandra Permuy.

O acto servirá para visibilizar e homenaxear ás mulleres que viviron en primeira persoa o proceso de reconversión industrial, poñendo en valor o seu papel, moitas veces silenciado, nun momento clave da historia social e económica do concello.

02-03-2026 -

02-03-2026 -

Cultura

Sobes ao autobús do teatro?

O Centro Dramático Galego pon a disposición do Concello de Fene 17 prazas de autobús para asistir a unha representación da obra Hamlet no Salón Teatro de Santiago. A cita para os/as veciños/as do noso concello será o venres 27 de marzo, con saída ás 15.45 horas da Avda. do Concello e retorno aproximado sobre as 20.15/20.30 horas. O comezo da función está previsto para as 18.00 horas e o prezo da entrada ascende a 5 euros (autobús de balde).
As persoas interesadas poderán reservar a praza ata o día 23 de marzo enviando un correo electrónico a cultura.deportes@fene.gal ou no teléfono 981 340 366, indicando nome, apelidos e número de teléfono de contacto.

27-02-2026 -

27-02-2026 -

Fene ao día

Abre o prazo de inscrición para o XVI Concurso de Tapas de Fene, que se celebrará do 10 ao 19 de abril

O Concello de Fene vén de abrir o prazo de inscrición para participar no XVI Concurso de Tapas, que se desenvolverá entre os días 10 e 19 de abril, coa participación dos establecementos hostaleiros do municipio que queiran sumarse a esta iniciativa de promoción gastronómica e dinamización económica.
Os locais interesados poderán presentar as súas propostas ata o vindeiro 13 de marzo, ben a través do rexistro xeral do Concello de Fene ou da sede electrónica no caso de persoas físicas, ou exclusivamente a través da sede electrónica no caso de persoas xurídicas. Ademais, será obrigatorio o envío dunha fotografía da tapa durante o período de inscrición ao enderezo electrónico desenvolvemento.local@fene.gal.

26-02-2026 -

26-02-2026 -

Fene ao día

O Concello de Fene executa traballos de mantemento en camiños municipais e prepara novas actuacións na rede secundaria

O Concello de Fene está a levar a cabo esta semana distintos traballos de mantemento e acondicionamento en camiños municipais, no marco das actuacións habituais de conservación da rede viaria secundaria do municipio.
Parte desta rede presenta un grao de deterioro de diversa consideración, motivado principalmente polo paso do tempo, o tráfico intenso e as adversas condicións climatolóxicas, especialmente tras os prolongados episodios de mal tempo rexistrados nas últimas semanas. Neste contexto, ao longo destes días executáronse actuacións de mellora do firme en varios camiños do termo municipal.
Os traballos realizados consistiron en rozas e limpeza superficial previa, o perfilado e regularización do terreo mediante maquinaria mixta, así como a achega de zahorra artificial nas zonas máis deterioradas. Posteriormente procedeuse ao estendido, nivelado e compactado do material, co obxectivo de garantir unha correcta estabilidade do firme e unha mellor drenaxe.
As actuacións xa executadas corresponderon aos camiños de Buios e Rañoa (Sillobre), Rego da Moa (Barallobre) e Casal (Magalofes). Na actualidade os traballos continúan nos camiños de Tellerías (San Valentín) e outros na parroquia de Fene.