Concerto de As Pías no acto de presentación do libro gañador do XXXVIIII Premio Nacional de Poesía Xosemaría Pérez Parallé
15-05-2026
O CMI Unidade de Fene acolle este sábado a presentación de Vestiario, poemario co que Paula Currás Prada gañou o XXXVIII Premio Nacional de Poesía Xosemaría Pérez Parallé que organiza a entidade fenesa coa colaboración do Concello de Fene e a editorial Espiral Maior. O acto comezará ás 20.30 horas, con entrada libre e de balde até completar aforo. Ao remate actuará o grupo As Pías, concerto organizado pola Concellería de Cultura coa colaboración da Rede Cultural da Deputación da Coruña.
As Pías é un grupo de música tradicional galega de corda e vento que interpreta pezas tradicionais galegas arranxadas: de cancioneiros, de composición propia e de autores/as amigos. Tocadas con instrumentos tradicionais de corda mas tamén de vento como a requinta, o pito e a gaita galegas, ten tamén pezas cantadas tradicionais do repertorio galego e portugués.
O motivo fundamental da banda é reivindicar a corda na música tradicional e desfrutar da música galega e en galego, tentando dignificala e situala na posición que lle corresponde como representante do noso pobo. “Da guitarra galega e dos cordófonos en xeral son abondosas as referencias na historia (retablos, esculturas, gravados, cantigas, etc) e o seu uso popular segue a ser xeralizado no noso país salvo na música tradicional. Pola contra, os nosos irmáns portugueses e irlandeses usan a cotíoi os instrumentos de corda na súa música tradicional”. E As Pías, desde Galicia, reivindica o seu uso.
Malia sera un grupo de recente creación, As Pías afrontou o verán pasado cunha morea de actuacións, que o levou a compartir cartel con formacións da talla de Tiruleque, Sheyla Patricia ou Xabier Díaz entre moitas outras. Neste momento a banda traballa no seu primeiro traballo de estudo con dez temas inéditos ata a data.