O Mago Rafa achegará este xoves a maxia dos libros ás crianzas de Fene
22-04-2025

Abracalibro é o nome do espectáculo co que a Biblioteca Municipal Xosemaría Pérez Paralle festexará o xoves, 24 de abril, o Día do Libro. A función, organizada no marco do programa Ler conta moito, comezará ás 18 horas no salón de actos da Casa da Cultura e, para asistir, cómpre inscribirse esta tarde ou mañá na propia biblioteca ou por teléfono (981 342 302), de 16 a 21 horas.
Abracalibro, do Mago Rafa, propón unha "viaxe máxica para poñer en valor o poder da lectura. Con máis de 30 anos de experiencia, o artista combina neste espectáculo a maxia e o humor para espertar a curiosidade e a imaxinación. Trátase dunha actividade divertida e educativa que convida ás nenas e nenos de 3 a 12 anos (e ás súas familias) a mergullarse no fascinante mundo dos libros".
O Mago Rafa é un ilusionista, nado en Lugo, que ten un estilo propio baseado na cercanía. Os seus espectáculos procuran esa proximidade co público, achegándoo a un mundo de fantasía onde habitan o mentalismo, as adiviñacións, as viaxes de obxectos imposibles, etc. E sempre coa súa tarxeta de presentación: un humor cotiá e desenfadado para facer gozar a públicos de todas as idades.
Pero o Mago Rafa ten tamén unha faceta de presentador. Foi colaborador en diferentes programas de televisión e tivo un espazo semanal de 30 minutos en Cadena Ser, onde realizaba Maxia pola Radio mentres falaba da Historia da Maxia.