Novas
-
Festas acuáticas para festexar o fin de curso das escolas deportivas da piscina municipal de Centieiras
A Concellería de Deportes anuncia as datas e horarios das tradicionais festas acuáticas que organiza para pechar o curso das escolas deportivas municipais da piscina de Centieiras. A primeira cita será este sábado, 20 de xuño, coa festa de natación para bebés, á que seguirán o vindeiro sábado, 27 de xuño, as de Primeira Infancia, Iniciación Infantil e Perfeccionamento Infantil e Xuvenil. A continuación detállase o calendario previsto de actividades para estas dúas fins de semana.
-
Fene acollerá este domingo a Andaina Por+Vida con motivo do 18 aniversario do programa de educación física contra a fatiga oncolóxica
O Concello de Fene colaborará coa asociación Por+Vida na celebración da Andaina Por+Vida, unha iniciativa que terá lugar o vindeiro domingo 14 de xuño e que servirá para conmemorar o 18 aniversario do programa de educación física contra a fatiga oncolóxica.
As actividades desenvolveranse na Praza do Alcalde Ramón Souto González, onde ás 10.30 horas terá lugar a recepción e benvida ás persoas participantes. Entre as 11.00 e as 12.00 horas celebrarase a andaina, mentres que a programación continuará entre as 12.00 e as 13.00 horas coa lectura dun manifesto e cunha clase colectiva de baile impartida por Sandra García, da escola UPA Un Paso Adelante.
A xornada rematará cun xantar solidario consistente nunha churrascada, que se celebrará ás 14.30 horas no CCRD de Perlío e que contará coa actuación musical do grupo Os Tabernícolas.
-
A Concellería de Deportes anuncia para este verán un novo campamento lúdico-deportivo no CMI de Fene
O vindeiro martes 9 de xuño abre o o prazo de solicitude de cita previa para formalizar a inscrición no campamento lúdico deportivo que se desenvolverá nas instalacións do CMI Unidade de Fene, do 3 ao 14 de agosto. Organizado pola Concellería de Deportes de Fene, o campus vai dirixido a nenas e nenos nados entre o 2014 e o 2021 e o número de prazas é limitado (30).
Á hora de anotarse a esta actividade, terán preferencia os/as rapaces/as empadroados/as ou escolarizados/as en Fene ao longo do curso escolar 2025-26. Así, os días 9, 10 e 11 de xuño, de 9.30 a 14.30 horas colleranse citas previas (no teléfono 981 340 366) para matricular aos/ás rapaces/as empadronados/as ou escolarizados/as en Fene e, no caso de que queden prazas libres, o día 12 de xuño poderán solicitar cita previa no mesmo horario as familias de nenos/as doutros concellos.
