As actuacións permitirán actuar en varios puntos da rede viaria secundaria con problemas de deterioro
O Concello de Fene licita obras de mellora en camiños municipais por 69.000 euros
Os traballos inclúen a rehabilitación do firme e a mellora da seguridade viaria en diferentes parroquias
05-05-2026
O Concello de Fene sacou a licitación as obras de mellora en diversos camiños municipais, cun orzamento base de licitación de 69.000 euros. Unha cantidade que poderá verse minorado tras o correspondente proceso de adxudicación.
Esta actuación responde á necesidade de intervir na rede viaria secundaria municipal, que presenta en distintos puntos un grao de deterioro de diversa consideración, debido ao paso do tempo, ao tráfico intenso e ás condicións climatolóxicas adversas. Este desgaste resulta especialmente evidente nos tramos máis afastados dos núcleos urbanos consolidados, afectando tanto á comodidade como á seguridade da circulación, tanto rodada como peonil.
O proxecto contempla actuacións en varios camiños do termo municipal, entre eles o camiño en Fontelonga, o camiño en Sartego – Parque Castelao, o camiño en Sillobre próximo ao cemiterio e á avenida do Doutor Sixto Mauriz, o camiño por Almieiras, o camiño de accesos en Sartego e o camiño entre a estrada do Peirao e O Souto, todos eles con firmes deteriorados, con presenza de fochancas, disgregacións ou perda de capacidade estrutural.
As obras consistirán na rehabilitación e mellora funcional destes camiños, mediante tarefas de limpeza e preparación das superficies, reforzo estrutural dos firmes, execución de tratamentos superficiais bituminosos e implantación de nova sinalización vertical. As intervencións adaptaranse ás características e necesidades específicas de cada tramo, co obxectivo de garantir unha solución eficaz e duradeira.
Segundo as previsións técnicas, estas actuacións permitirán prolongar a vida útil dos firmes arredor de dez anos, mellorando de maneira significativa as condicións de uso e seguridade.
A alcaldesa de Fene, Sandra Permuy, destacou que “esta licitación responde á vontade de seguir mellorando a rede viaria municipal e dar resposta ás necesidades da veciñanza, especialmente nas zonas onde o deterioro é máis acusado”. A rexedora subliñou tamén que “seguimos avanzando nun plan de actuación continuado que busca manter en boas condicións as infraestruturas básicas do concello”.
Pola súa banda, o concelleiro de servizos, Adán Chao, explicou que “estas intervencións permitirán actuar sobre tramos concretos que presentan un estado máis deficiente, garantindo unha mellora notable da seguridade e da transitabilidade”. Ademais, sinalou que “o obxectivo é optimizar os recursos dispoñibles e ofrecer solucións duradeiras que eviten intervencións constantes a curto prazo”.
Desde o Concello de Fene inciden en que estas actuacións forman parte dunha estratexia global orientada a manter e mellorar a rede viaria municipal, contribuíndo a unha maior calidade de vida da veciñanza e a unha mobilidade máis segura e eficiente.