Dende a Concellaría de Benestar Social e Igualdade do Concello de Fene, convócase para hoxe xoves 12 de xuño 2025 ao persoal do Concello, ao persoal político e a todas as persoas que desexen unirse, a unha concentración silenciosa ás 12:00 h na porta da Casa do Concello para manifestar públicamente a condea e rexeitamento polo ASASINATO MACHISTA acontecido en Campo Lameiro e veciña de Moraña, MARISOL COSTA DE 49 ANOS
Agradecemos de antemán a vosa asistencia como xesto de condea, repulsa e solidariedade.

Unha vez aplicados os criterios de baremación establecidos nas bases, a Concellería de Cultura de Fene vén de adxudicar as prazas do campamento lingüístico e de conciliación Verán máis alá! As nenas e nenos que non obtiveron praza, quedan en lista de agarda. No caso de que se produzan baixas trala publicación da listaxe, contactarase coas familias suplentes para cubrir todas as prazas.

A partir do xoves día 12 de xuño, enviaranse as cartas de autoliquidación para as persoas admitidas. O prazo para aboar a cota será do 13 ao 19 de xuño de 2025.

A alcaldesa de Fene, Sandra Permuy, e o primeiro tenente de alcalde, Manuel Polo, mantiveron unha reunión de traballo cos representantes do Foro Cidadán polo Ferrocarril, co obxectivo de abordar as necesidades urxentes de mellora da rede ferroviaria na comarca de Ferrolterra.

Durante o encontro, celebrado na Casa do Concello, a rexedora fenesa trasladou o compromiso do goberno local coa defensa do tren como servizo público estratéxico. "É imprescindíbel avanzar na modernización da infraestrutura ferroviaria e apostar pola súa funcionalidade real, con servizos que dean resposta ás necesidades da veciñanza", sinalou Sandra Permuy.