Concello de Fene · Portal cidadán

Noticias

Ver máis

30-04-2025

30-04-2025 - Fene ao día

Fene entregou os premios do XV Concurso de Tapas nun acto que puxo en valor a creatividade e compromiso da hostalería local

O salón de plenos do Concello de Fene acolleu o acto de entrega de premios do XV Concurso de Tapas, un certame que este ano acadou unha excelente acollida entre o público e que consolidou o seu papel como referente na dinamización da hostalaría local. No acto participaron o alcalde, Juventino Trigo; a concelleira de promoción económica, Ángeles Coira; e as concelleiras Sandra Permuy, Adán Chao, María Carmen Martínez e Alejandro Gutiérrez. Tamén estiveron presentes representantes dalgúns dos establecementos participantes e das entidades patrocinadoras, como Establecimientos Aguilar e Eroski Center.

25-04-2025

25-04-2025 - Fene ao día

O Concello de Fene licitou un servizo de limpeza viaria por 88.200 euros para actuar nas oito parroquias

O Concello de Fene vén de licitar por 88.200 euros o servizo de limpeza e roza das marxes das vías e camiños municipais nas oito parroquias do municipio. O contrato, que ten unha duración dun ano porrogábel por outro, está xa en execución tras iniciar os primeiros traballos en Sillobre, e proseguirá nas demais parroquias ao longo das vindeiras semanas.

Coidarme para poder educar, tema dunha nova sesión do programa Máis que un teito

23-04-2025 - Benestar e igualdade

Os coidados, dar e recibir, a xestión do estrés, o autocoidado e a autoestima. Son algunhas das cuestións que se abordarán o vindeiro luns, 28 de abril, ás 18.30 horas, nunha nova sesión do ciclo para familias "Máis que un teito", organizado polas Concellerías de Servizos Sociais dos Concellos de Fene, Mugardos e Neda. A sesión será impartida por Naira González Fontenla, educadora social e psicopedagoga. O encontro desenvolverase no salón de actos da Casa da Cultura de Fene e, para asistir, cómpre inscribirse até o venres 25 de abril, indicando se precisa servizo de conciliación para atender ás crianzas. Prazas limitadas (30)

O Mago Rafa achegará este xoves a maxia dos libros ás crianzas de Fene

22-04-2025 - Cultura

Abracalibro é o nome do espectáculo co que a Biblioteca Municipal Xosemaría Pérez Paralle festexará o xoves, 24 de abril, o Día do Libro. A función, organizada no marco do programa Ler conta moito, comezará ás 18 horas no salón de actos da Casa da Cultura e, para asistir, cómpre inscribirse esta tarde ou mañá na propia biblioteca ou por teléfono (981 342 302), de 16 a 21 horas.

O Pleno do Concello de Fene aproba uns Orzamentos de máis de 16 millóns de euros para 2025

21-04-2025 - Fene ao día

O Pleno do Concello de Fene aprobou esta mañá en sesión extraordinaria o proxecto de Orzamentos municipais para o exercicio 2025 presentado polo goberno local, cun importe total de 16.152.157,82 euros. As contas contaron cos votos favorábeis dos grupos de goberno (BNG, con 7 concelleiras, e Esquerda Unida, con 1), a abstención do PSOE (3 concelleiras) e o voto en contra do Partido Popular (6 concelleiras).

A concelleira de Facenda, Ángeles Coira, amosouse satisfeita pola aprobación polo pleno duns Orzamentos “elaborados con rigor, realistas, que dan continuidade ao traballo que vimos facendo desde hai anos e que responden ás necesidades reais da veciñanza de Fene”. Descatou ademais a aposta do goberno local “pola mellora das infraestruturas, o reforzo dos servizos públicos e o apoio ao tecido asociativo e económico local”.

Pola súa parte, o alcalde de Fene, Juventino Trigo, puxo en valor “a capacidade do goberno local para xestionar con responsabilidade, mantendo o equilibrio orzamentario e impulsando investimentos sen comprometer a saúde financeira do Concello”. Subliñou tamén que “estas contas consolidan un proxecto de municipio sostíbel, solidario e cunha clara aposta polo benestar da veciñanza”.